كان سكتت مافيش حرية .. وكان تكلمت طابور خامس
امير الظلام
الناس الاولى تقول كلام الحق وجّاع .. وعلاش قامت الثورة مش ع الحرية ورفع الظلم؟
بنتكلم
1ـ البلاد مهتوكة وكل ليلة نسمعوا في رصاص ومش عارفين شنو القصة وتكثر الاقاويل والاشاعات .
2ـ الثوار أو من الناس المحسوبة ع الثوار ترتكب في أخطاء في كل الاماكن وليس آخرها مع تونس ع البوابة وحتى داخل ليبيا في الجهات الادارية .
3ـ سمعنا اخبار عن هروب سجناء وعلى فرار هالة المصراتي ووديان لتونس ؟ مافيش منو اكد ولا منو نفي؟ وين الاعلام ؟ ولا شادينها اغاني ورقيص زي عهد معمر الله لا تحرمه.
4ـ اللي يتكلم ع مصلحة البلاد يطلع طابور خامس واحتمال تنطب مع أن روح روحك مع الثورة واحتمال تنطب اذا مافيش فائدة الظلم قعد غير بنكهة جديدة .
5ـ الاشاعات تلعب في البلاد وكل واحد يجبذ من جهة ومافهمنا شي من الاخير .
6ـ المسئولين يتصارعوا ع شنو مافهمتش ؟ع كرسي 8 شهور ؟ والله انه كرسي من نار .
7ـ القبلية اللي انتشرت في البلاد وع قبيلة بيقيموك كانك من القبيلة الفولانية مؤيد وكانك من الفولانية راجل ؟
نبي نفكركم انها ثورة شعب كل القبائل اشتركت فيها صح بنسب مختلفة ... وبعدين للمصلحة العامة وللمصالحة الوطنية لازم نحتوي الجميع مش نبنوا بلادنا ولا تبوها ((الزير سالم )) كل واحد وقبيلته ؟ وحنا بالليبي نقولوا كل شاه معلقة مع كراعها والقرءان يقول (( كل نفس بما كسبت رهينة )) يعنى منرجعوش لسيلسة العقاب الجماعي متع القذافي .. المجرم ينال جزائه وشن دخل قبيلته ؟
8ـ الوزراء ماعرفناش باشرووو ولا لا وشنو يلي يقدروا يديروه في 8 شهوووور ؟ مافهمتش ربي يصبرهم وخلاص .
9ـ الاسعار المرتفعة جدا جدا مافيش من تكلم عليها وكل واحد همه في الوزير الفولاني شن قبيلته ؟؟؟؟ شنو كان ولد عمك بتخش الجنة مثلا ؟
خلاصة القول : استهدوا بالله وترحموا ع ارواح الشهداء يلي ماتوا ع خاطرها الارض وماتخونوش دمهم وابنوا بلادكم وخطاكم من الكلام الفارغ .. معمر مات ومعش عندنا سبلة .
ليبي حر متبغدد
ليست هناك تعليقات:
إرسال تعليق