الجمعة، 2 ديسمبر، 2011

يا وزير يا جديد ... اسمع الملخص المفيد
خليفة البشباش
حتقولي مشغول وعندي اجتماع ..
وتقول شعب مهبول ويسبب الصداع
لا يا مسؤول خليك في الاستماع
***
شوف يا دبلوماسي .. واسمعني يا سياسي ..
نذكروك كانك ناسي .. يا عاشق الكراسي ..
نحنا اللي رفعناك وانتا كنت تساسي
شوف شعبك .. ما تشوفش روحك
يعني ما تنفخش روحك
اسمع لكل مواطن واتحمل الكلام ..
تم زمان الفاتح وثورة للامام
اكيد فاهم قصدي
ولو مش فاهم نفصلوا القضية
راهوا نعرفوكم .. كنتوا تغشوا الرعية
وتديروا وثيقة عهد .. وعشرين برقية
باش تزيدو اليومية والمنح الشهرية
وماكانش يهمكم خراب البلاد .. وهموم العباد
والرشوة والفساد .. والظلم والاستبداد
لكن توا خلاص تغيروا الليبيين
وثارو الثائرين وزحفوا الملايين
يعني الكلام اللي فات خط عليه خطين ..
وركز معايا واسمع كلمتين
***
نعاود مرة ثانية .. اسمع لكل مواطن
تعرف على بلادك في كل الاماكن ..
تشوف المشاكل في الطرق والمساكن
تسمع هموم الناس بدون اي مانع ..
كل الليبيين اللي واقف في الشارع .. واللي طالع من الجامع
دور في البلاد وحتى قرية ما تنساش
لكن المشكلة انك حتى العاصمة ما تعرفهاش
اطلع على رجليك لطريق الصطاش
اركب سيارتك .. اطلع من السواني وعدي لغريان
اهااااا ... اول مرة تركب الجبل ؟؟
ما تخافش . مش حتموت ..
كمل الطريق لين توصل نالوت
فوت على القلعة واركب للرجبان ..
شوف الحوامد جادو والزنتان
شوف الخمس ومصراتة ولبدة وصبراتة
برا للجنوب وشوف القطرون ..
ما تنساش الكفرة ومن سبها برا لهون
شوف شوارعهم زي القرضة والمنشية ..
وكمل للشراقة وشوف الدرناوية ..
شوف اجدابيا والبيضا وخصوصا حي الستمية
كمل لبنغازي
ورد بالك تعاند شوف ليبيا زنقة زنقة لين توصل مساعد
صلح الاوضاع مش تقعد تصيح
ومش تقولنا انجازات وجو التلقيح
متع شيدنا المدارس .. وفتحنا المخابز .. ودرنا طريق مليح
***
عارفك ما فهمتنيش
نقولك باسلوب ثاني.. كل اللي انتا فيه انا ما يهمنيش
احزاب ومصائب ووزارة واجتماع ..
مناصب وسفارة وصناديق اقتراع
وكلاء وحقائب وجلسة استماع
كله ماليش فيه ..
انا اللي يهمني المستشفى والشوارع
المدارس المساكن .. الوظائف والمصانع
اني مش ملزوم نفهم اللي تبيه
بس انت ملزوم تجيب اللي نبيه
***
شوف من الاخير
من غير مظاهرات ولا ميدان تحرير
لازم تخدم شعبك اللي يبي التغيير
ولازم تتعود على الوضع الاخير
يعني انتا موظف زيك زي الغفير
تدير اللي عليك وتاخد اللي ليك
مش حنعلقولك صورة
ولا نديرولك مسيرة
ولا حنديرولك لافتة .. لا صغيرة ولا كبيرة
يعني نبو افعال وما نبوش اقوال
ما نبوش تراوغ .. نبو تسجل اقوال
***
ان شاء الله تكون فهمت حاجة
______
خليفة البشباش - نالوت


ليست هناك تعليقات:

إرسال تعليق